Innleiðing annarrar kynslóðar þolhönnunarstaðlanna (Eurocodes) hefur tekið stór skref fram á við á síðustu misserum. Langflestir staðlarnir hafa nú verið staðfestir sem evrópskir staðlar. Nú þegar er hægt að nálgast þá sem forstaðla í staðlabúðinni þar til þeir verða staðfestir og gefnir út sem íslenskir staðlar í byrjun árs 2028.
Áður en evrópskur staðall er staðfestur fer hann í gegnum formlegt samþykktarferli. Fyrst fer staðallinn í Enquiry (ENQ), sem er opinbert umsagnarferli þar sem aðildarlönd CEN fara yfir drögin og skila athugasemdum. Athugasemdirnar eru síðan teknar til umfjöllunar og eftir atvikum eru gerðar tæknilegar breytingar á drögunum. Að því loknu fara endurskoðuð drög í Formal Vote (FV), sem er lokaatkvæðagreiðsla um útgáfu staðalsins. Mikilvægt er að ná góðri sátt um tæknilegt innihald staðalsins fyrir FV, þar sem ekki er gert ráð fyrir tæknilegum breytingum á textanum á milli samþykktar í FV og útgáfu staðalsins.
Þótt staðall hafi verið staðfestur sem evrópskur staðall getur síðar komið í ljós þörf á breytingum eða lagfæringum. Þá er gefinn út breytingarviðauki (Amendment), oft merktur A1 þegar um fyrstu breytingu er að ræða. Slíkur viðauki getur falið í sér breytingar á tæknilegum kröfum, skýringar eða aðrar efnislegar uppfærslur á staðlinum og þarf að fara í gegnum formlegt samþykktarferli áður en hann tekur gildi. Þegar breytingin hefur verið staðfest verður hún hluti af staðlinum.
Nú þegar hafa breytingarviðaukar verið gefnir út fyrir nokkra af annarrar kynslóðar þolhönnunarstöðlunum, sem undirstrikar mikilvægi þess að fylgjast vel með þróun staðlanna jafnvel eftir að þeir hafa verið staðfestir sem evrópskir staðlar.
.jpg){kind=link}