Aðalfundur Staðlaráðs Íslands var haldinn fimmtudaginn 20. maí. Fyrir utan hefðbundin aðalfundarstörf hélt Dr. Snjólaug Ólafsdóttir erindi fyrir fundargesti undir heitinu "Loftslagsmál og sjálfbærni fyrirtækja - Leiðarljós til framtíðar". Að erindi hennar loknu hófust hefðbundin aðalfundarstörf. Fundarstjór var kjörin Andri Sveinsson.
Kristjana Kjartansdóttir formaður stjórnar Staðlaráðs Íslands flutti skýrslu stjórnar og fór yfir helstu þætti ársins í starfi Staðlaráðs. Á meðal þess sem kom fram í erindi Kristjönu var að "rekstur Staðlaráðs skilaði jákvæðri niðurstöðu, þrátt fyrir óvissu sem fylgdi heimsfaraldrinum. Á árinu fór ný heimasíða í loftið, ný vefverslun og nýjar þjónustuleiðir. Með þessu er verið að bæta aðgengi að stöðlum og koma betur til móts við þarfir viðskiptavinanna. Áfram var unnið að því að styrkja ímynd Staðlaráðs og nýtt myndmerki var tekið í notkun. Það byggir á gullsniði talna og er auðvelt að tengja myndmerkið við þann kraft, framsýni og umbætur sem einkennir reksturinn. Fagstaðlaráðin slógu ekki slöku við í stöðlunarverkefnum ársins líkt og fram kemur í skýrslum þeirra". Nánar er hægt að lesa um starfsárið í ársskýrslu Staðlaráðs sem er aðgengileg á vefnum.
Ásamt erindi formanns stjórnar fluttu formenn fagstaðlaráða erindi og fór yfir helstu vörður sem urðu á leið fagstaðlaráða á árinu ásamt því að fara yfir helstu tölur í rekstri. Að því loknu fór Helga Sigrún Harðardóttir, framkvæmdastjóri Staðlaráðs Íslands yfir ársreikninga samtakanna. Rekstur Staðlaráðs Íslands gekk vel á árinu og helstu lykiltölur í rekstrinum jákvæðar.
Stjórnarkjör fór fram að loknu erindum. Í framboði voru eftirfarandi einstaklingar:
Formannskjör
Kristjana Kjartansdóttir - Verkfræðingafélag Íslands
Aðalmenn í stjórn
Ásdís Sigurðardóttir - Marel
Gyða Björg Sigurðardóttir - Ráði
Helga Jóhanna Bjarnadóttir - Samtök atvinnulífssins
Sigurður Másson - Neytendasamtökin
Varamenn í stjórn
Sigurbjörg Sæmundsdóttir - Umhverfis- og auðlindaráðuneyti
Ágúst Valgeirsson - (Á ár eftir af kjörtíma sínum)
Sjálfkjörnir í stjórn
Egill Viðarsson - Formaður Byggingastaðlaráðs
Emil Sigursveinsson - Formaður Rafstaðlaráðs
Kristján Þórarinsson - Formaður Fagstaðlaráðs í fiskimálum
Þorvarður Kári Ólafsson - Formaður Fagstaðlaráðs í upplýsingatækni
Engin mótframboð komu fram á fundinum og hlutu því allir frambjóðendur kjör í stjórn Staðlaráðs Íslands.
Að loknu stjórnarkjöri var farið yfir síðustu dagskrárliði. Á meðal þeirra var ákvörðun aðildargjalda, ákvörðun þóknunar stjórnarmanna, rekstraráætlun 2021 og kosning skoðunarmanns reikninga lögð fyrir aðalfund til samþykktar. Allar tillögur stjórnar voru samþykktar á fundinum.
Að því loknu þakkaði fundarstjóri fyrir sig og sleit fundinum.
Frekari upplýsingar um starfsár Staðlaráðs má nálgast HÉR á vef Staðlaráðs ásamt ársreikningum.
