Hvað er staðall?

Staðall er opinbert skjal ætlað til frjálsra afnota. Í staðli er að finna reglur, leiðbeiningar eða skilgreiningar sem miða að því að tryggja tiltekna virkni, að hlutir passi og að þeir skili því sem af þeim er krafist. Allt er þetta gert til þess að auka hagkvæmni, til einföldunar og til þess að draga úr kostnaði.

Staðlastarfið er mjög umfangsmikið en nefna má eftirfarandi sem dæmi um fyrirbæri sem eru stöðluð:

• Mál og vog, stærðfræðitákn
• Vörupallar, gámar, flutningatæki
• Íðorðasöfn, vörumerkingar, tákn á skiltum
• Stærðir á dekkjum, skrúfum, róm og kveikikertum
• Prófanir á efnum og matvælum
• Byggingarhlutar
• Greiðslukort
• Íhlutir í bíla, flugvélar og skip
  
  ...og svo mætti lengi telja.

Staðlar gegna mikilvægu hlutverki í viðskiptum, bæði innan einstakra landa og á alþjóðavettvangi. Samning þeirra byggist á því að hagsmunaðilar komi sér saman um hvað sé hæfilegt, eðlilegt, góðar starfsvenjur og í takt við tímann. Ákveðnar reglur eru viðhafðar um samningu og samþykkt staðla, sem og þátttöku við gerð þeirra.

 

---