Staðlamál

Fyrsta af mörgum
Tækniforskriftin er greinargóð lýsing á rafrænum reikningi sem hægt verður að nota í viðskiptum innanlands og milli landa í Evrópu. Forskriftin þjónar sem leiðarvísir fyrir forritara hugbúnaðarkerfa og aðra þá sem koma að innleiðingu rafrænna reikninga í fyrirtækjum og stofnunum. Tækniforskriftin er sú fyrsta í röðinni af mörgum sem leiðbeina munu um gerð pantana, miðlun vörulýsinga og flóknari innkaupaferla, sem varða t.d. afhendingu vöru með fylgiseðli, og fleiri þætti rafrænna viðskipta.

Vinna við gerð tækniforskriftar um rafrænan reikning á rætur að rekja til samstarfs Norðurlanda og Bretlands í verkefninu „Northern European Subset” (NES), sem á síðasta ári fluttist yfir á vettvang evrópsku staðlasamtakanna CEN, í vinnuhópinn “Business Interopera-bility Interfaces on public procurement in Europe” (WS/BII). Framan af var íslensk þátttaka í þessu starfi í höndum Fjársýslu ríkisins og ICEPRO en með stofnun tækni-nefndar fagstaðlaráðs í upplýsingatækni (FUT) um grunngerð rafrænna viðskipta, á síðasta ári, varð til sá vettvangur sem þessa dagana er að skila af sér áðurnefndum afurðum.

Mikill fjöldi einstaklinga frá fyrirtækjum og stofnunum hefur lagt sitt af mörkum til að gera tækniforskriftina TS-135 að veruleika. Forsendur til markvissrar innleiðingar nýrra viðskiptahátta hafa aldrei verið betri.

Ráðstefna
Þann 14. október, á alþjóðlega staðladaginn, verður haldin ráðstefna á Grand Hótel Reykjavík þar sem tækniforskriftin um rafrænan reikning verður kynnt ásamt stuðningsefni sem rithópar tækni-nefndarinnar hafa tekið saman. Þar munu lausnaraðilar kynna afurðir sínar og notendur segja frá markmiðum sínum hvað varðar innleiðingu rafrænna viðskipta í fyrirtækjum sínum og stofnunum.

Rúnar Már Sverrisson, Logar, formaður fagstaðlaráðs í upplýsingatækni, FUT, Laufey Erla Jóhannesdóttir, Síminn, formaður vinnuhóps FUT um grunngerð rafrænna viðskipta, Ragnar T. Jónasson, Landsbankinn, formaður tækninefndar FUT um grunngerð rafrænna viðskipta.

Aðrir tenglar sem tengjast TS 135 >>

PANTA TS 135 >>