Staðlamál

Fundur í Bergen í október
Auk Íslendinga og Norðmanna hafa 7 lönd skráð sig sem virka þátttakendur í starfinu, en þau eru Kanada, Indland, Malasía, Suður-Afríka, Tæland, Bretland og Víetnam. Fjórtán lönd til viðbótar hafa skráð sig sem aukaaðila, þar á meðal hin Norðurlöndin, Þýskaland, Spánn, Japan, Argentína og Brasilía.

Nefndin mun semja staðla sem

• auðvelda sjálfbæra þróun í sjávarútvegi og fiskeldi,
• bæta alþjóðlega vöktun og stjórnun auðlinda sjávar,
• veita nákvæmar lýsingar á tæknilegum búnaði,
• eru tæki til að tryggja umhverfisvernd,bæta heilbrigði og velferð eldisdýra,
• auðvelda rekjanleika sjávar- og eldisafurða,
• samræma skráningu, dreifingu og notkun tölulegra framleiðslugagna,
• tryggja alþjóðlegt samþykki aðferða við sýnatöku og greiningu,
• bæta öryggi starfsmanna,
• tryggja samræmda notkun hugtaka. 

Stefnt er að því að halda fyrsta fund nefndarinnar í Bergen um miðjan október. Á þeim fundi verður verksvið nefndarinnar skilgreint nánar, verkefnalisti samþykktur, kosinn formaður og skipað í vinnuhópa.

Ræðst af áhuga og viðbrögðum hagsmunaaðila
Stjórn Staðlaráðs taldi eðlilegast að sett yrði á stofn nýtt fagstaðlaráð, í samræmi við starfsreglur Staðlaráðs, til að annast þátttöku í þessu alþjóðlega starfi, samræma afstöðu íslenskra hagsmunaaðila og skipuleggja vinnu þeirra. Undirbúningshópur var settur á stofn sem í eiga sæti fulltrúar frá LÍÚ, Samtökum fiskvinnslustöðva, Matís, Fiskistofu, FÍS og stjórn Staðlaráðs. Hópurinn er að semja starfsreglur fyrir væntanlegt fagstaðlaráð og kanna áhuga hagsmunaaðila á að taka þátt í starfinu og ganga til liðs við Staðlaráð.

Til að hægt verði að stofna fagstaðlaráð á aðalfundi Staðlaráðs í lok maí þurfa þeir hagsmunaaðilar sem vilja taka þátt í starfinu (og ekki eru þegar aðilar að Staðlaráði) að sækja um inngöngu í Staðlaráð sem fyrst. Fagstaðlaráðið verður ekki stofnað nema 15-20 aðilar séu reiðubúnir að taka þátt í því og leggja eitthvað af mörkum.

Staðlaráð tekur út af fyrir sig ekki afstöðu til þess hvort eða hvernig skuli taka þátt í alþjóðlegu staðlastarfi sem þessu. Hafi hagsmunaaðilar ekki áhuga á að leggja fram vinnu og fjármagn þá verður ekkert af íslenskri þátttöku í starfinu. Þeir alþjóðlegu staðlar sem nefndin mun semja munu þá ekki taka mið af íslenskum hagsmunum eða aðstæðum, sem getur þýtt verri markaðsstöðu íslenskra afurða, tækja og búnaðar.