Staðlamál

Samantekt

„Þegar viðmælendur voru spurðir hvað þeim kæmi fyrst í hug þegar Staðlaráð er nefnt á nafn svaraði rúmlega helmingur því til að það væru staðlarnir. Tæpur fjórðungur kvað góða þjónustu, gott skipulag  og starfsfólk Staðlaráðs koma fyrst upp í hugann.  Rúmur tíundi hluti aðspurðra nefndi aðgang að stöðlum og utanumhald og útgáfu á þeim. Þegar spurt var um sterkar hliðar Staðlaráðs nefndu rúm fjörutíu prósent aðgang að stöðlunum, utanumhald um þá og útgáfu þeirra. Tæpur þriðjungur nefndi góða þjónustu, lipurð og flýti og tæplega tíundi hluti aðspurðra nefndi traust og gott skipulag og að ráðið væri öflugt. Um sjötti hluti aðspurðra hafði ekki svar þegar spurt var um sterkar hliðar. Þegar spurt var um veikar hliðar ráðsins dreifðust svörin mjög. Rúmur tíundi hluti nefndi skort á aðgengi á internetinu og jafn hátt hlutfall nefndi dýra staðla. Tæpur tíundi hluti aðspurðra nefndi heimasíðuna og tölvukerfið. Svipaður fjöldi nefndi flókið aðgengi og erfiðleika með að nálgast staðlana. Rúm fjörutíu prósent aðspurðra höfðu ekki svar þegar spurt var um veika hlið.

Nær allir þeir sem spurðir voru kváðust ánægðir eða mjög ánægðir með þjónustu Staðlaráðs. Það sem viðmælendum líkaði við þjónustuna var fljót og skilmerkileg afgreiðsla á fyrirspurnum og hve starfsfólkið legði sig vel fram í því að leysa úr málum fyrir viðskiptavininn. Þá er þjónustan talin persónuleg og viðmót starfsfólksins alfarið talið mjög gott eða gott. Það sem viðmælendum fannst að betur mætti fara í þjónustunni var þegar vantar á um aðgengi að stöðlunum og útvegun þeirra í gegnum netið á tölvutæku formi. Þá er nefnt að staðlarnir séu dýrir og að það þurfi að koma kostnaðinum niður, einnig kemur fram að viðmælendum finnst að Staðlaráð mætti kynna sig meira útávið og þær nýjungar sem fram koma á sviði staðlamála. Almennt  eru þeir sem spurðir voru mjög ánægðir eða ánægðir með þá ráðgjöf og leiðbeiningar sem starfsmenn Staðlaráðs láta í té. Aðspurðir um hvað skipti mestu máli í þjónustu Staðlaráðs nefnir rúmur þriðjungur að það sé að staðlarnir séu til staðar og aðgengi að stöðlum og upplýsingum. Tæpur þriðjungur nefnir skjóta afgreiðslu og lipurð við útvegun staðlanna. Tæpur fjórðungur nefnir þekkingu, fagmennsku og réttar upplýsingar. Rúmur helmingur þeirra sem spurðir voru kváðust lesa Staðlamál, fréttabréf Staðlaráðs. Þeir sem kváðust lesa fréttabréfið voru spurðir um reynslu sína af því og töldu þrír fjórðu þeirra að hún væri góð eða mjög góð en um fjórðungur að hún væri þokkaleg. Tæp níutíu [prósent] kváðust nýta sér heimasíðu Staðlaráðs. Aðspurðir um reynslu sína af því lýstu um tveir þriðju þeirra góðri eða mjög góðri reynslu en aðrir sögðu almennt að reynslan væri aðeins þokkaleg.

[...] Þessar niðurstöður og ekki hvað síst hin fjölmörgu ummæli sem svörunum fylgja gefa góða innsýn í viðhorf viðskiptavina; hvað það er sem þeir eru ánægðir með og hvað þeir vilja að gert sé til þess að mæta þörfum þeirra betur. [...] Aðalatriðið með því að gera könnun sem þessa er ekki að fá upplýsingarnar í hendur, heldur hvernig þær eru nýttar til þess að lagfæra það sem betur má fara og færa sér í nyt jákvæðar ábendingar.