Staðlamál

Mikilvægt að fylgjast með
Staðlar eru afar mikilvægir í evrópsku lagaumhverfi. Tilskipanir og reglugerðir Evrópusambandsins (og EES) vísa mikið til staðla og slíkt færist sífellt í vöxt. Allir samevrópskir staðlar eru staðfestir sem íslenskir staðlar, og það er því afar mikilvægt fyrir íslenska hagsmunaaðila að fylgjast vel með evrópsku staðlastarfi. Þær reglur sem settar eru fram í stöðlum munu öðlast gildi hér á landi, og því verður að gæta þess að tryggja hugsanlegum íslenskum séraðstæðum sess í stöðlum.

Evrópskir staðlar eru unnir með öryggi og heilsu manna og dýra, umhverfisvernd og sjálfbæra nýtingu auðlinda í fyrirrúmi, en jafnframt er markmið með stöðlun að tryggja samkeppnishæfni evrópsks atvinnulífs.
Aðild hefur marga kosti
Aðilar að Staðlaráði eiga jafnframt kost á að taka þátt í innlendu og alþjóðlegu staðlastarfi og hafa áhrif á stefnumótun og forgangsröðun í starfinu.

Fyrirtæki, stofnun eða félag sem gerist aðili að Staðlaráði Íslands

• leggur sitt af mörkum til að efla staðlastarf á Íslandi, til hagsbóta fyrir íslenskt  atvinnulíf og íslenskan almenning,
• nýtur afsláttarkjara við kaup á íslenskum stöðlum,
• hefur tækifæri til að taka þátt í gerð íslenskra staðla,
• getur fylgst með og/eða tekið þátt í evrópskri og alþjóðlegri staðlagerð,
• hefur ávallt aðgang að nýjustu upplýsingum um gildandi og væntanlega staðla, íslenska sem alþjóðlega,
• getur haft áhrif á staðlastarf á þeim fagsviðum sem skipta það mestu máli,
• getur tekið þátt í að móta stefnu í staðlamálum, með því að koma hagsmunamálum sínum á framfæri innan Staðlaráðs eða fagstaðlaráða þess,
• hefur atkvæðisrétt á aðalfundi Staðlaráðs og þar með áhrif á stærstu ákvarðanir þess.

Fyrirtæki, stofnun eða félag sem gerist aðili að Staðlaráði Íslands

• greiðir árlegt aðildargjald samkvæmt ákvörðun aðalfundar Staðlaráðs,
• velur hvort það vill láta aðildargjald sem það greiðir renna til almennrar starfsemi Staðlaráðs eða til eins eða fleiri fagstaðlaráða Staðlaráðs,
• samþykkir að starfa samkvæmt starfsreglum Staðlaráðs og viðkomandi fagstaðlaráðs eða -ráða, eins og við á.

Nánari upplýsingar er að finna á vef Staðlaráðs, www.stadlar.is.

Guðrún Rögnvaldardóttir, framkvæmdastjóri Staðlaráðs Íslands.