Staðlamál

Sameiginlegur skilningur kaupanda og seljanda
Neytendasamtökin fá reglulega inn á borð til sín mál sem varða fasteignaviðskipti og Staðlaráð fær oftsinnis upphringingar frá fólki sem er ósátt við afhendingu húsnæðis, þar sem kaupandi og seljandi eru ekki á einu máli um hvað átt var við til dæmis með því að húsnæðið skyldi afhendast tilbúið til innréttingar. Með því að nota staðalinn má tryggja að skilningur kaupenda og seljenda á ákvæðum samninga sem þeir gera um nýtt eða endurnýjað eða ófullbúið húsnæði sé hinn sami.

Sjö byggingarstig húsa
Í staðlinum eru skilgreind sjö byggingarstig:

• Byggingarstig 1 - Byggingarleyfi
• Byggingarstig 2 - Undirstöður
• Byggingarstig 3 - Burðarvirki fullreist
• Byggingarstig 4 - Fokheld bygging
• Byggingarstig 5 - Tilbúin til innréttingar
• Byggingarstig 6 - Fullgerð án lóðar-
   frágangs
• Byggingarstig 7 - Fullgerð bygging

Engir sem nota staðalinn í samningum þurfa að velkjast í vafa um hvað felst í því að húsnæði skuli afhendast tilbúið til innréttingar, svo dæmi sé tekið. Byggingarstig 5 er nákvæmlega skilgreint og tiltekið hvað skuli vera til staðar þannig að því stigi sé náð; frágangur skilveggja er tíundaður, frágangur lofta, lagna innanhúss, rafbúnaðar, varmaeinangrunar, svala, þaks, lóðar og fjölmargra annarra þátta. Allt er tilgreint sem þarf að vera klárt þannig að húsnæðið teljist tilbúið til innréttingar.