Staðlamál

Hérlendis hafa í tvö og hálft ár verið í gildi tvö sett þolhönnunarstaðla. Annað settið byggir á dönskum stöðlum og er með íslenskum sérákvæðum.  Hitt settið samanstendur af evrópskum forstöðlum (ENV, Eurocodes) með íslenskum þjóðarskjölum (NAD, National Application Documents) sem skilgreina sérstakar kröfur vegna notkunar hérlendis.  Hönnuðir og/eða framkvæmdaaðilar hafa frjálst val um hvort staðlasettið er notað við hönnun mannvirkja en verða að halda sig við annað settið.  Byggingarreglugerðin vísar til beggja staðlasettanna.

Næstu skref
Innan Evrópsku staðlasamtakanna (CEN) er nú unnið að því að endurskoða evrópsku forstaðlana um þolhönnun og gefa þá út sem fullgilda staðla (EN).  Sú vinna gengur samkvæmt áætlun og verða nýju þolhönnunarstaðlarnir alls 58.  Hver þjóð þarf síðan að semja sérstakan þjóðarviðauka (National Annex) með hverjum staðli til þess að skilgreina frekar þau gildi sem nota ber við hönnun mannvirkja í viðkomandi landi.  Í formála hvers staðals verður skilgreint hvaða atriði þarf að fjalla um í þjóðarviðauka þess staðals. 

Ekki blanda saman !
Ekki er heimilt að blanda saman notkun gömlu forstaðlanna (ENV) og nýju staðlanna (EN).  Jafnframt er ekki heimilt að hefja notkun nýju staðlanna fyrr en heildstætt sett staðla hefur komið út og ekki fyrr en þjóðarviðaukar viðkomandi lands liggja fyrir og vísað hefur verið til staðlanna í byggingarreglugerðinni.

Hér á landi er aðeins hafinn frumundirbúningur að vinnu við gerð þjóðarviðauka (National Annex) fyrir endurskoðaða þolhönnunarstaðla.  Viðræður hafa átt sér stað við fulltrúa umhverfisráðuneytisins um þá vinnu sem er framundan og m.a. hefur ráðuneytið kallað eftir áliti Veðurstofunnar varðandi vindálag og snjóálag.  Jafnframt er unnið að því að fá upplýsingar um þjóðarviðauka í nágrannalöndunum.

Mjög æskilegt er að hönnuðir kynni sér innihald nýju staðlanna (EN) eftir því sem þeir koma út því það mun m.a. auðvelda alla umræðu um innihald þjóðarviðaukanna þegar þeir verða sendir til umsagnar samkvæmt þeim reglum sem gilda um útgáfu staðla á vegum Staðlaráðs Íslands.

Tekið saman í janúar 2005
Dr. Hafsteinn Pálsson framkvæmdastjóri BSTR