Tækninefndir og verkefni

Orkustjórnun í litlum og meðalstórum fyrirtækjum - Kynningarfundur 15. október

Norræni nýsköpunarsjóðurinn og Staðlaráð eru að hrinda af stað verkefni um orkustjórnun í litlum og meðalstórum fyrirtækjum. Gróðurhús, bakarí og prentsmiðjur eru hvött sérstaklega til að taka þátt í verkefninu. Ætlunin er að þróa hagnýt verkfæri í samvinnu við einstök fyrirtæki til að ná fram orkusparnaði með orkustjórnun.

Nánari upplýsingar um verkefnið >> 

 

Nýr staðall um raforkuvirki

Komin er út nýr staðall, ÍST 200:2006 - Raflagnir bygginga,  um rafmagnsöryggi á vegum Staðlaráðs Íslands. Þessi nýi staðall byggir á alþjóðlegu staðlaröðinni IEC 60364 og evrópskum HD 384 samræmingarskjölum. Neytendastofa – rafmagnsöryggisdeild mun leggja til við iðnaðar- og viðskiptaráðuneytið að vísað verði í nýja staðalinn í nýrri reglugerð sem mun leysa núverandi reglugerð (nr. 264) um raforkuvirki af hólmi. Nánari upplýsingar um staðalinn fást hér.

Handbók tæknimanna

Í tengslum við útgáfu staðalsins og það að til hans verði vísað í reglugerð er það ætlun Rafstaðlaráðs (RST) og Samtaka atvinnurekenda í raf- og tölvuiðnaði (SART) að gefa út skýringarhandbók um staðalinn að fyrirmynd annarra Norðurlandaþjóða. Þessi handbók mun fjalla um staðalinn og útskýra, með texta og myndum, hvaða hugsun liggur á bak við einstök ákvæði hans og gefa dæmi um útfærslu. Handbókin er hugsuð sem leiðbeiningar- og hjálparrit fyrir hina ýmsu hópa tækni- og iðnaðarmanna í rafmagni. Slík handbók mun bæta úr brýnni þörf sem verið hefur á aðgengilegu ítarefni um ákvæði reglugerðar um raforkuvirki og stuðla um leið að betri, vandaðri og samhæfðari frágangi raflagna og raforkuvirkja.

Skýringarhandbókin verður sniðin að norskri fyrirmynd (sjá hér ) og verður tæplega 300 blaðsíður unnin á vandaðan hátt.

Fóstrun tækninefnda

Til að virkja fleiri innan RST til þátttöku í starfinu hefur aðilum verið boðið að taka tækninefndir í “fóstur". Sá sem hefur áhuga á að fylgjast með störfum tækninefnda CENELEC og/eða IEC fær send öll gögn sem berast frá nefndunum. Hann kynnir sér gögnin eins og þau gefa tilefni til og gerir stjórn RST viðvart ef einhver atriði í störfum nefndarinnar þarfnast kynningar eða umfjöllunar á íslenskum vettvangi. Hægt er að fá aðgang að gögnum frá tækninefndunum í gegnum Internetið. Þeim sem hafa áhuga á slíku er bent á að hafa samband við Sigurð Sigurðarson, ritara rafstaðlaráðs, í síma 520 7150.

Tækninefndir CENELEC

---