Fréttir af FUT

Tækninefndir fagstaðlaráðs í upplýsingatækni, FUT, starfa í umboði framkvæmdaráðs FUT, samkvæmt reglum Staðlaráðs og fagstaðlaráðsins, en þær má finna á vef Staðlaráðs.

Meginhlutverk tækninefndarinnar verður að hafa umsjón með gerð normskjala um samskipti milli aðila vegna rafrænnar greiðslumiðlunar kredit- og debetkorta.

Gert er ráð fyrir að fyrsta verkefni tækninefndarinnar verði gerð tækniforskriftar um samskipti posa/miðlægs þjóns (tækniþjónusta t.d. Point, HandPoint) við móttökubúnað hjá færsluhirði eða þjónustu-/vinnsluaðila hans (t.d. Greiðsluveitan).

Í tækniforskriftinni eru skilgreind þau skeyti sem flytja gögn til meðhöndlunar heimildar- og fjárhagslegra færslna með greiðslukortum. Tillaga er um að nýta forskrift að samskiptum sem að Greiðsluveitan hefur þróað undanfarin ár. Jafnframt verður tekið mið af því starfi sem á sér stað hjá evrópskum og alþjóðlegum staðlasamtökum.

Starfstími nefndarinnar er ótímabundinn, en hún setur sér nánari markmið, verkefna- og tímaáætlun í samræmi við það umboð sem henni er gefið.

Tækninefndin er öllum þeim opin sem hafa hagsmuna að gæta á starfssviði nefndarinnar og eru reiðubúnir til að leggja fram þá vinnu, aðstöðu og/eða fjármagn sem þarf til að standa undir starfi nefndarinnar.

Helstu hagsmunaðilum er sent þetta fundarboð, en til þeirra teljast verslunarfyrirtæki, þjónustuaðilar á sviði greiðslumiðlunar, fjármálafyrirtæki, framleiðendur og útgefendur korta, hugbúnaðarfyrirtæki og opinberir aðilar.

Steinunn Valdimarsdóttir
Fagstaðlaráði í upplýsingatækni (FUT)